السياحة في كولومبياكولومبيا

السفر الى كولومبيا من المغرب بدون فيزا | 2024 | بالدارجة المغربية اليك دليل السياحة في كولومبيا للمغاربة

السفر الى كولومبيا من المغرب بدون تأشيرة .. بتاريخ 6 أبريل 2021 وقعات المملكة المغربية وجمهورية كولومبيا، على ربعة ديال الاتفاقيات اللي كتهم البلدين خلال اجتماع بالفيديو دارو وزير الخارجية “ناصر بوريطة” مع نظيرته الكولومبية “كلوديا بلوم”.

اللي كيهمنا حنا فهاد الاتفاقيات وكتناسب مع موضوعنا ديالنا هي الاتفاقية الثانية اللي كتعلق بحذف تأشيرة الإقامة قصيرة الأجل بالنسبة للمواطنين المغاربة والكولومبيين صحاب الباسبور العادي والدبلوماسي.

يعني هاد الاتفاقية غادي تولي تسمح للمغاربة يسافرو لكولومبيا ويبقاو فيها لمدة تقدر توصل حتى لـ 90 يوم بلا فيزا ولا هم يحزنون ، ونفس الأمر بالنسبة للكولومبيين اللي يقدروا حتى هوما يجيو للمغرب ويبقاو فيه لمدة مكتجاوزش 90 يوم بدون تاشيرة .

المصدر: وزارة الشؤون الخارجية والتعاون الإفريقي و المغاربة المقيمين بالخارج

جدول المحتويات

تحديث مهم : دخول اتفاقية الاعفاء من التأشيرات بين المغرب وكولومبيا حيز التنفيذ

في الرباط وبتاريخ الخميس 28 أكتوبر استقبل وزير الخارجية المغربي “ناصر بوريطة” نائبة الرئيس ووزيرة العلاقات الخارجية الكولومبية، “مارتا لوسيا راميريز”.

فهاد الاستقبال ناقشو بزاف ديال لحوايج اللي كتهم البلدين ولكن أهم حاجة كنا كنتاظروها حنا الناس ديال السفر هو يعطيو الضو لخضر لدخول اتفاق تبادل اعفاء التأشيرة بين المغرب وكولومبيا حيز التنفيذ . وهادشي اللي وقع .

“..وفي أعقاب التوقيع على مجموعة من الاتفاقيات خلال اجتماع العمل الذي انعقد يوم 6 أبريل2021، تبادل الطرفان المذكرات المتعلقة بدخول اتفاق الإعفاء من التأشيرات لحاملي جوازات السفر العادية حيز التنفيذ، وهو ما سيساهم في تعزيز التبادلات السياسية والاقتصادية والاجتماعية والتجارية والأكاديمية بين البلدين الصديقين“.

مقتطف من البيان المشترك لوزير الخرجي المغربي ووزيرة العلاقات الخارجية الكولومبية

المهم من نهار تم الإعلان على هاد الاتفاق ولات كتجينا بعض الرسائل من عند قراءنا الأفاضل كيطلبوا منا نتكلموا على هاد الموضوع ونقدموا بعض المعلومات على السفر الى كولومبيا للمغاربة وأفضل أماكن السياحة في كولومبيا اللي يقدر يزورها لواحد ، وأيضا شحال ديال لمصاريف اللي يدير بحسابها لمسافر …الخ

هاداك علاش قررنا نكتبوا مقال مفصل اللي يقادر يعتابرو القارئ الكريم دليل ارشادي للسياحة في كولومبيا، واللي غادي نعرفو فيه بدولة كولومبيا وشنو خاصك تدير باش تقدر تسافر ليها من المغرب والاجراءات اللي غادي تدير فالمطار قبل وبعد الوصول.

ومن بعد غادي نتكلموا على أجمل الأماكن السياحية في كولومبيا وأيضا تكاليف نفقات السفر والعديد من المعلومات الأخرى.

وعلى غير العادة ديالنا في موقع هجرة بوست قررنا نكتبو هاد المقال بالدارجة المغربية، لسببين

  • باش يقدر أي مغربي يفهم هاد الموضوع بلا حتى اشكال
  • باش نعرفو بالدارجة المغربية ديالنا أكتر ونتصالحو مع اللغة اللي كتمتل الهوية ديالنا

عموما الى كنتى مهتم خويا ختي بهاد لموضوع فمرحبا بيك معايا أنا كاتب المقال “طارق الحكيم ” ونتمنى تلقى المعلومات اللي كتقلب عليها فهاد الدليل.

لمحة عامة عن دولة كولومبيا :

ميمكنش تسافر لشي بلاد بلا متعرف عليهاوالو، عل الأقل خاصك تعرف شوية دلمعلومات باش تعرف فين غادي وفين غاتحط رجليك كما قال الدون بيغ في معلقته “واش عارف فين غادي ولا راك غير شاد

على أيِِ خودليك بعض المعلومات السريعة على دولة كولومبيا اللي ضروري خاصك تعرفهم

أين تقع كولومبيا ؟

كولومبيا جات فالشمال الغربي ديال أمريكا الجنوبية كيحدها من الشمال البحر الكاريبي ومن الشرق فنزويلا والبرازيل ومن الجنوب بيرو والإكوادور ومن الشمال الغربي بنما ومن الغرب المحيط الهادي

كولومبيا عندها الحدود البرية مع 5 ديال الدول وكيبلغ المجموع ديال هاد الحدود 6،672 كم

هاد الدول هي البرازيل 1790 كم ، الإكوادور 708 كم ، بنما 339 كم ، بيرو 1494 كم ، فنزويلا 2341 كم.

خريطة كولومبيا - السفر الى كولومبيا من المغرب
خريطة كولومبيا – Google Maps

معلومات سريعة عن كولومبيا

  • الاسم الرسمي ديال كولومبيا : جمهورية كولومبيا (بالإسبانية: República de Colombia)‏ وخدات  هاد الاسم تيمنا بالمستكشف كريستوفر كولومبوس
  • عاصمة كولومبيا : بوغوتا
  • مساحة كولومبيا : 1141748 كيلومتر مربع
  • نظام الحكم في كولومبيا : جمهورية رئاسية
  • رئيس كولومبيا : إيفان دوكي
  • لغة كولومبيا : الإسبانية
  • عدد سكان كولومبا : 50.355.650 على حساب تقديرات 2021 فعدد
  • الدين في كولومبيا : الروم الكاثوليك 79% ، البروتستانت 14%، ديانات خرى 2% ، و 5٪ غير محددة بحسب (تقديرات 2014)
  • عملة كولومبيا : بيزو كولومبي – The Colombian peso وكيرمزو ليه بـ COP
  • عملة كولومبيا مقابل الدرهم المغربي : 1 بيزو كولومبي = 0,0024 درهم مغربي (يعني 1000 بيزو كولومبي الى الله كتجيب 2,40 درهم مغربي)
  • توقيت كولومبيا : ناقصة خمسة دسوايع على التوقيت العالمي المنسق (UTC−5)
  • رمز دولة كولومبيا فالأنترنت : co.
علم كولومبيا - دول بدون فيزا للمغاربة 2021 كولومبيا
علم كولومبيا ..ثلاثة شرائط أفقية من الأصفر، أزرق ، وأحمر ؛ يحتفظ العلم بالألوان الثلاثة الرئيسية لراية كولومبيا الكبرى ، جمهورية أمريكا الجنوبية التي لم تدم طويلاً والتي انفصلت عام 1830 ؛ توجد تفسيرات مختلفة للألوان وتشمل: الأصفر للذهب في أرض كولومبيا ، والأزرق للبحار على شواطئها ، والأحمر للدم الذي أراق لتحقيق الحرية ؛ بدلاً من ذلك ، تم وصف الألوان بأنها تمثل مفاهيم أكثر عنصرية مثل السيادة والعدالة (الأصفر) ، والولاء واليقظة (الأزرق) ، والشجاعة والكرم (أحمر) ؛ أو ببساطة مبادئ الحرية والمساواة والأخوة 

الموهيم كانت هادي غي بعض المعلومات السريعة على كولومبيا واللي تقدر تلقاهها بسهولة فالأنترنت الى كنتي باغي مزيد من التفاصيل. وندوزو دابا للموضوع ديالنا اللي متعلق بمعلومات السفر الى كولومبيا من المغرب بدون فيزا

اجراءات السفر الى كولومبيا من المغرب بدون فيزا :

أنا مغربي(ة) باغي(ة) نحقق حلم السفر الى كولومبيا شنو خاصني ندير ؟ وشنو هي الوثائق اللي خاصني نجمع باش نقدر نسافر؟

الى كنتي باغي تدير السياحة في كولومبيا هاشنو خاصك تجمع :

1. جواز السفر :

أول حاجة خاص يكون عندك جواز مزال فين غايموت يعني  ساري المفعول لمدة 3 أشهر على الأقل بعد العودة من السفر.

الى مكانش عندك جواز سفر وعاد ناوي تصاوبو، يمكليك تدخل لهاد المقال باش تعرف الوثائق والخطوات اللي خاص تدير باش تصاوب جواز السفر المغربي

جواز السفر المغربي .. تعرف على الوثائق المطلوبة لجواز السفر المغربي 2024

2. حجز تذكرة الطيران :

أيضا من شروط السفر من المغرب الى كولومبيا هو حجز تذكرة الطائرة ذهابا وايابا.

حجز تذاكر الطيران من المغرب الى كولومبيا فيه جوج طرق:

أ_ حجز تذكرة الطيران الى كولومبيا عن طريق الانترنت :

تقدر تدخل لبعض المواقع المتخصص بحجز تذاكر الطائرة، اللي تقدر تلقاها بمجرد أنك تكتب حجز طيران من المغرب الى كولومبيا في محرك البحث Google .

غادي يتأفيشاو ليك عشرات المواقع المتخصصة في حجوزات الطائرة ويمكلك الدخول الى موقع ارخص تذاكر طيران اللي كيقدم عروض جيدة عن تذاكر طيران مخفضة .

ولكن باش تقدر تلقى تذاكر طيران مخفضة من المغرب الى كولومبيا خاصك تعلم كيفاش تصيد الهمزات، هداك علاش كنصحك تدخل تقرا هاد المقال اللي غادي تلقى فيه نصائح كيفاش تمكن من حجز تذاكر طيران مخفضة جدا ، اللهم إني قد بلغت 😉

تذاكر طيران مخفضة .. خذ 12 نصيحة ستنفعك في تخفيض أسعار تذاكر الطيران

عموما الى كنتي مفيك ما تطبخ راسك مع هاد المواقع تقدر تقوم بحجز تذاكر الطيران بالطريقة الثانية

ب_ حجز تذكرة الطيران عن طريق وكالة السفر:

هاد الطريقة معنديش معاها ، خصوصا مين كتدخل عندهوم وكيبقوا عليك بالبروتوكلات الخاوية بحال الى منعرف شنو كيديرو.

ولكن هاد الطريقة نوعا ما آمنة ، يعني مكتخافش تكون ضحية نصب أو احتيال مشي موقع مزيف، غير هو كيكون خاصك تدفع مبالغ مالية كتوسع مقابل هاد الخدمة.

3. حجز فندق :

باش تجنب أي مشكل فالمطار من الأحسن ليك تقوم بحجز فندق ولا هوستيل أو أي حاجة أخرى باش تبين بللي عندك مكان للاقامة في كولومبيا وبللي ماغديش تنعس فالزناقي (ماتصبح لا نتا لا حوايجك )

4_ صرف وتحويل العملات :

كيحق للمسافرين اللي كيدخلو لكولومبيا إحضار إجمالي مبالغ مكتعداش  10000 دولار أمريكي أو ما يعادلها بالعملة الأجنبية (تقريبا 100 ألف درهم)، بما في ذلك العملة الكولومبية القانونية نقدًا.

المسافر يقدر يدخل معاه الفلوس على شكل:

  • العملات الأجنبية نقدا
  • العملات الأجنبية في شكل أوراق مالية قابلة للصرف
  • أدوات تداول العملات الأجنبية

من هادشي كولو تقدر تصرف فلوسك الى الدولار حيت كيتعاملو بيه فكولومبيا غير هو ما خاصش لفلوس كاش تعدى 10 دلمليون سنتيم ديالنا

وباش تدير هاد العملية خاصك تدوز لوكالة صرف العملات اللي غادي تبيع ليك الدولار مقابل الدرهم.

ومن بعد ماكتبدل فلوسك غادي تعطيك الوكالة وصل اثبات أنك قمت بتحويل مبلغ معين الى الدولار.

خاصك تحتافض بهاد الوتيقة حيت يقدور يطلبوها منك فالمراقبة فالمطار.

قبل السفر الى كولومبيا من المغرب ها شنو خاصك تعرف بخصوص طرق الدفع:

في الوجهات السياحية الرئيسية في كولومبيا، مثل بوغوتا أو سانتا مارتا أو بارانكويلا أو كالي أو ميديلين أو كارتاخينا أو سان أندريس أو بيريرا أو بوكارامانغا ، وكذلك في مدن كولومبيا لوخرى، يمكن ليك تخلص مقابل مشترياتك نقدًا أو بخصم أو ائتمان البطاقات.

يمكن ليك تستخدم  بطاقات الائتمان في جميع المتاجر الكبرى وفبعض المتاجر الصغيرة أيضًا.

البطاقات اللي مقبولة أكثر هي Visa و MasterCard وكذلك  American Express و Diners Club.

غير هو قبل ما تستخدم  بطاقات الخصم أو الائتمان الخاصة بك في كولومبيا ، تأكد بللي عندك  أموال كافية متاحة لرحلاتك واستفسر لبالي يكون البنك اللي كتعامل معاه كيقطع ليك من فلوسك  على عمليات السحب التي كتم في الخارج.

5. الحصول على تأمين صحي:

وزارة السياحة الكولومبية كتوصي الناس اللي باغيين يسافرو لكولومبيا بالحصول على تأمين طبي دولي لضمان التغطية الكاملة فحالة الى حتاج المسافر لعناية طبية.

معلومات السفر الى كولومبيا للمغاربة في المطار:

هاد المعلومات كتنقاسم لجوج أقسام، وهي المعلومات اللي متعلقة بمطار المغادرة والمعلومات اللي متعلقة بمطار الوصول

أ. في مطار الانطلاق

المعلومات اللي غانهضر عليها موجهة بالخصوص للناس اللي أول مرة غايسافرو فالطائرة هداك علاش غاتكون هاد المعلومات على شكل نصائح

1. الحضور 3 ساعات قبل موعد السفر:

من الأفضل ليك تجي للمطار قبل ثلاثة دسوايع من موعد اقلاع الطائرة ، علاش ؟

حيث بعض المرات كيكونو المسافرين كتار الشي اللي كيخلي عمليات التفتيش ووضع الحقائب …الخ  كتكون طويلة بعض الشيء.

أيضا خاص المسافر يقرا البيانات المتواجدة في تذكرة سفره باش يعرف بلاصتو في الطائرة ومجموعة من المعلومات الأخرى.

2.احضار كل وثائق السفر:

نهار السفر خاصك ديما تفكر فوثائق السفر اللي عليها طالع الفيلم

  • جواز السفر ساري المفعول؛
  • وثيقة حجز تذكرة الطائرة؛
  • وثيقة حجز الفندق؛
  • التأمين الصحي
  • وصل اثبات تحويل الأموال.
  • وثيقة اجراء اختبار الكشف عن كورونا

ب. في مطار الوصول :

كاينة واحد الضريبة كيخلصوها الركاب مقابل استخدامهم لمرافق المطار وخدمات شركات الطيران التجارية.

كاينين بعض شركات الطيران اللي كتدخل هاد الضريبة فرسوم أسعار التذاكر، هداك علاش نتا مكتخلص والو. وكاينين اللي مكيديروها وكيخليوك نتا تخلصها مين توصل.

المهم الى بغيتي تزيد تعرف على هاد الموضوع تقدر تواصل مع هيئة خدمات المطار على الأرقام التالية :

  • Telephones: + 57 (1) 425 1000,
  • ext. 2588 and 2083
  • Fax: + 57 (1) 413 9459

أو اتصل بشركة الطيران الخاصة بك اللي شريتي منها تذكرة الطائرة

دول بدون فيزا للمغاربة | هاته هي الدول التي تقول للمغاربة مرحبا ادخلوها “بسباطكم”

ادخال الأمتعة في المطار :

كاينين جوج أنواع من الأمتعة اللي تقدر تدخل معاك للمطار فكولومبيا وهي : الأمتعة المصحوبة والأمتعة غير المصحوبة .

  • لأمتعة المصحوبة: هي الأمتعة اللي كيحملها مع المسافر ابحال صاك صغير ومتعلقات شخصية وعناصر مسموح بها.
  • الأمتعة غير المصحوبة: هي الأمتعة اللي كتدخل الدولة قبل أو بعد وصول الزائر . يجب تسمية هذا النوع باسمه.

من هادشي كامل الى كان عندك شي أمتعة غير مصحوبة ودخلات لكولومبا قبل 30 يوم من وصولك أو بعد 90 يوم من وصولك فغادي تدفع ضريبة 15% على هاد الأمتعة.

نتا الى كنتي غادي تدخل جزء من الأمتعة ديالك أو غادي تدخلها كلها عن طريق الشحن فخاصك التصريح بذلك في اقرار الأمتعة وتخبر موظف الجمارك قبل مغادرة منطقة الجمارك.

جلب المال والبضائع:

بالإضافة للأمتعة الشخصية ، كيحق لكل زائر جلب الأموال والبضائع إلى كولومبيا. واللي تقدر تكون معفية أو خاضعة للضرائب على حساب الشروط التالية

  • متعداش  10،000 دولار أمريكي أو ما يعادله بأي عملة أخرى. إلى كان المبلغ أكبر من هذا الحد ، فخاصك الإفصاح عنه للسلطات الجمركية المقابلة.
  • بضائع للاستخدام العائلي أو الشخصي بمبالغ غير تجارية تصل إلى 1500 دولار أمريكي. هاد البضائع معفاة من الضرائب وكتحسب كأمتعة شخصية

من هادشي كولو باش منطولوش الى كنتي داير صاكك فوق كتافك وباغي تعرف بحق الرجال كما قال الشاعر الكبير “سعيد موسكير” في معلقته  فراك ماغدي تخلص والو

ولكن الى كنتب مزال باغي بعض التفاصيل سوا الى كنب ياغي تدخل الحيوانات ديالك أو باغي تدخل معاك شي متريال للاستخدام المهني أو الرياضي …الخ فكنصحك تدخل لهاد الموقع اللي غاتلقى فيه بزاف ديال التفاصيل

colombia.travel/ Visas and Embassies

أفضل الوجهات السياحية في كولومبيا :

الى جبينا نهضرو على كاع الوجهات السياحية اللي كاينة في كولومبيا ، فمغاديش نساليو، يكفي تعرف أن كولومبيا هي موطن 10 ٪ من التنوع البيولوجي في العالم غادي يخليك تعشق هاد البلد.

زيد على ذلك المناظر الخلابة والغابات المورقة ، والشواطئ الجميلة ، ورقص السالسا ، والطعام اللذيذ ، والمواقع القديمة في Tierradentro ، و Lost City ، و San Agustín ، ومدن عصرية مثل Medellín و Bogotá ، كولومبيا لديها كل شيء.

المهم غادي نحاولو نتعرفو جميع على بعض أشهر الأماكن السياحية اللي نصحوا بها أي واحد كيحلم في السفر الى كولومبيا من المغرب .

1. السياحة في بوغوتا :

كيفما سبق لينا عرفنا بأن بوغوتا هي العاصمة ديال كولومبيا النابضة بالحياة.

وسط المدينة التاريخي اللي معروف باسم ، La Candelaria ، عامر بالمباني الاستعمارية والمتاحف والمطاعم والبارات والكنائس التاريخية والمنازل التي كيعود تاريخها إلى قرون.

فالطرف الشمالي من المدينة هو موطن للفنادق والمحلات التجارية ومناطق الترفيه مثل Zona Rosa و Zona G.

فالغالب غادي تحطك الطيارة فالعاصمة هداك علاش استاغل الفرصة وتسارا فهاد المدينة الرائعة قبل ماتنتاقل لمدين أخرى

ثمن الرحلة من المغرب إلى كولومبيا
السفر الى كولومبيا من المغرب .. صورة لإحدى الكنائس التاريخية في بوغوتا عاصمة كولومبيا

2. زيارة المدينة المفقودة :

تجربة السفر الى كولومبيا من المغرب ما غديش يكون فيها ما يتعاود الى مزرتيش المدينة المفقودة.

هاد المدينة تم البناء ديالها حوالي 800 ميلادية وكتحتاوي على 169 مدرج منحوت في الجبال.

فالحقيقة هي أجمل الرحلات اللي تقدر تدير فكولومبيا، غير هو متقدرش تمشي ليها بوحدك خاصك ضروري تمشي مع منظم رحلات.

الرحلات كتستغرق من 3 الى 6 ايام وكطيح من 300 الى 350 دولار أمريكي.

3. رحلة إلى جزيرة جورجونا

هاد الجزيرة (Isla Gorgona) كانت شحال هادي سجن، الله ينجينا وينجيكوم، ولكن تحولات لجزء من حديقة وطنية تقع على بعد 50 كيلومتر تقريبا من ساحل المحيط الهادي.

فهاد الجزيرة غادي تشوف الأنواع ديال الحيوانات المخيفة والغير مخيفة، البرية والبحرية، بحال الثعابين والكسلان وفالبحر مين تكون فالقارب غاتشوف الحيتان الحدباء والقرش والسلاحف البحرية العملاقة..

غادي تشوف أيضا البقايا ديال هاد السجن المرعب وفين كان كيدوز على بنادم الدكاكة.

ثمن زيارة هاد الحديقة واصلة لشي 10 دولار بلا شطارة.

4.زيارة مدينة القهوة “سالينتو – Salento :

يقول المثل المغربي “جيتي لبلاد فليو وقاصك الرواح” . هاد المثل واخا ماعندو تا معنى فهادشي اللي جاي، ولكن بغيت نقولو باش يجي حساب معا “جيتي لبلاد لقهوة وحرقك راسك” 😅😅

كيفما هو معروف كولومبيا كتعتابر موطن ديل أفضل أنواع القهوة فالعالم.

هاداك علاش الى بغيتي تعرف المراحل الأولية اللي كدوز منها القهوة اللي كتشرب فالصباح فخاصك تضرب دويرة مزارع القهوة اللي كاينة فهاد لبلاد.

وما فيها باس الى بغيتي تقضى شوية ديال لقهوة وتجيبها معاك لمالين دار فماغديش تلقى حسن من هاد لفرصة ، حيت غادي تاخدها رخيصة وبجودة عالية.

مدينة سالينتو هي أفضل بلاصة تقدر تلقى فيها مزارع القهوة وتقدر تشرب وتقضى منها القهوة ذات الجودة العالية.

هاد لمدينة كتعتابر أقدم مدينة فكولومبيا متخصصة في زراعة القهوة، هداك علاش ضروري تزورها وراه ثمن الجولة مكبتعداش 20 ألف بيزو كولومبي  أي 6 دولارات تقربيا.

عند السفر من المغرب إلى كولومبيا فلا تضيع فرصة زيارة مدينة Salento المشهورة بالقهوة الممتازة

5. رحلة إلى الأمازون

السفر الى كولومبيا من المغرب غادي يكون غي مضيعة ديال الوقت الى وصلتي حتى لتماك وما مشيتيش للأمازون.

حوض الأمازون كيغطي تقريبا ثلث مساحة كولومبيا وهو أحسن بلاصة للناس اللي كتعشق الغابة

فالبدية ديال هاد المنطقة الشاسعة كاينة واحد المدينة سميتها Leticia جات على حدود ديال دولة البيرو والبرازيل هاد لمدينة كتعتابرنقطة انطلاق لأماكن الاقامة القريبة فالغابة والقرى الأصلية على نهر الأمازون.

كاينين مناطق فالأمازون صالحين لركوب الشلال وداكشي ديال التجديف ومشاهدة الأنواع المختلفة ديال الطيور اللي معمرك شفتيهوم فحياتك (خلينا من الزاوش وطيرابقر وبوعميرة) ،بحال منطقة Guaviare و Putumayo و Caqueta

زيارة الأمازون مكنصحكش تمشي ليها بوحدك ضروري خاصك شي منظم رحلات، حيت هاد الغابة اللي كتعتابر أكبر غابة فالعالم مامعاهاش اللعب.

التراجي ديال هاد الرحلات المنظمة كيبدا  بركوب قارب عبر النهر من ليتيسيا والتوقف مع قبيلة من السكان الأصليين قبل الوصول إلى حديقة أماكاياكو الوطنية .ومن بعد تقدر تزيد فالرحلة ديالك لمناطق أخرى

الأسعار ديال هاد الرحلات كيختالف اعتمادًا على مدة الرحلة ديالك ولكن مغديش تطيح قل من 50 دولار أمريكي .

6. زيارة منتزه تيرادينترو – Tierradentro

Tierradentro اللي كاينة فمقاطعة كاوكا هي واحدة من أهم المواقع الأثرية في أمريكا الجنوبية.

هاد الموقع كيحتوي على أكثر من 100 مقبرة تحت الأرض تعود إلى القرن العاشر قبل الميلاد.

الى بغيتي تسارا غي فهاد الموقع حول المقابر الأثرية فخاصك نهار ولا يوماين. وغادي تطيح عليك القضية بـ 6 دولارات باش تقدر تدخل لهاد الموقع لمدة يوماين

7. السياحة في قرطاجنة – Cartagena :

نهار تحقق حلم السفر من المغرب الى كولومبيا وتزو هاد المدينة ، غادي تبقى فين ما تجادل مع شي واحد على السفر والتجوال غاتقولو  “أنا مشيت حتى لقرطخنة وكتغانن معايا

مدينة – Cartagena  أو قرطاجنة أو قرطاخنة هي مدينة كاينة فدولة اسبانيا وكاينة أيضا في كولومبيا.

قرطاجنة الكولومبية كتعتابر من أكثر الوجهات السياحية في كولومبيا بحكم أنها مدينة تاريخية كتعود لعام 1533.

اللي زوين فهاد المدينة هو البلدات القديمة فيها والدروب اللي دايرين بحال المتاهات وبلطين بالحجر  والبالكونات اللي فيهم الورد وداكشي ديال الرومانسية.

المهم الى كنتي مع الحبان ديالك 😍😍 فهاد لمدينة غاتجيك سانك سانك

8. لا تنسى زيارة مدن كولومبيا المعروفة بالكرنفالات :

الواحد غي كيسمع الكرنافالات كيمشيو بالو مع كرنفال ريو دي جانيرو ولكن واش فخبارك بلي كولومبيا كتنظم سنويا أكبر كرنفال فالعالم فمدينة  بارانكويلا  وكيدار فشهر فبراير.

أيضا فالأسبوع الأول من شهر يناير كاينين كرنفالات كتنظمهم مدينة Pasto و Manizales صراحة شي حاجة هاربة خصوصا مع كرنفال بلانكو نيكرو في Manizales اللي كتكون فيه الرغوة والدقيق والصباغة وداكشي ديال التكرفيص الممزوج بالحرية وهي تجربة كنوصي بها أي شخص عاشق للمرح

9.السياحة في غوتابي Guatapé :

مدينة Guatapé كتعتابر من أجمل مدن كولمبيا وأكثر المدن ملونة فالعالم.

الأغلبية ديال المنازل التقليدية  فهاد المدينة كتلقى فيها رسوم الجداريات ديال الحيوانات والشخصيات المؤثرة والأشكال…

يكفي أنك تضرب دويرة فهاد لمدينة غادي تحس بانك فوسط الفن النابع من قلوب الناس مباشرة.

ومين تشرب قهوتك وتبغي تحرك شوية يكفي أنك تسلق واحد الدرج شديد الانحدار باش توصل لقمة ديال واحد الصخرة مشهورة جايا شادة أفضل المناظر فالبلاد وصالحة غي لتصاور ، وأرا يديك على الانستغرام  والستوريات والجمل المعبرة بحتال “سافر فأنت لست شجرة” وفقص ليا لعديان 😎😎

10. التنزه في حديقة تشينجازا الوطنية

الى كان عندك شوية ديال الفضول العلمي فما فيها باش تضرب دويرة لحديقة تشينجازا الوطنية اللي كتعتابر واحدة من أكبر المحميات الطبيعية في كولومبيا.

هاد الحديقة هي موطن لأكثر من 1000 نوع من النباتات و 187 نوعًا من الطيور.

وفهاد الحديقة غادي تعرف على نظام بارامو البيئي وكيف يؤثر على نظام المياه العالمي. وكيف أن ما يقرب من 80% من إمدادات المياه في بوغوتا تأتي من تشينجازا.

تكلفة السفر إلى كولومبيا من المغرب

دابا وصلنا للمهم ووصلنا لحساب، باش تعرف بشحال غاطيح عليك هاد التسافيرة، هاداك علاش جيب ماكينة دلحساب وبدا تحسب كيف ما دار لمهيدي مع باه .

تكلفة السفر إلى كولومبيا
تكاليف السفر الى كولومبيا من المغرب نجدها مرتفعة في تذاكر الطيران بينما في المصاريف الأخرى هي رخيصة مقارنة مقارنة بدول أخرى (الصورة تعبيرية فقط وهي مقتطفة من المسلسل المغربي “وجع التراب”)

سعر تذكرة الطيران من المغرب إلى كولومبيا

ثمن الرحلة من المغرب الى كولومبيا كتراوح بين 8000 درهم  حتى لـ 25000 درهم نتا وكيفاش صيدتي على لهمزة .وواش هاد الرحلة مباشرة أو غادير ليسكال

أشهر الخطوط الجوية من المغرب إلى كولومبيا هي الخطوط الفرنسية, اير كندا , الخطوط الملكية المغربية

تكلفة الاقامة في كولومبيا :

كتكلف معظم غرف النوم في بيوت الشباب (هوستيل) في كولومبيا ما بين 9 الى 14 دولار في الليلة.

ولكن في المدن والبلدات الصغار تقدر تلقى الثمن أقل وغي بـ 7 دولار لليلية.

الى بغيتي تبات فالنزل فالثمن يقدر يوصل حتى لـ 15 دولار ويقدر يوصل حتى لـ 30 دولار فالليلة فأيام الدروة حتى هوما فيهوم لخصايل ديالنا.

الفنادق الاقتصادية كتوصل حتى لـ 18 دولار فالليلة أما هاديك اللي جاية على لبحر وفأيام الذروة راها كتوصل حتى لـ 40 دولار فالليلة.

الفنادق المصنفة كتوصل حتى 200 دولار لليلة ولكن كاتكون خمس نجوم.. وتفطح ليا مع راسك.

كاينين طرق باش تطيح عليك الاقامة بأقل الأثمان أو فابور  عن طريق Airbnb أو Couchsurfing وهاد الموضوع غادي نخصصو ليه مقالين مفصلين في المستقبل.

تكلفة المعيشة في كولومبيا :

تكلفة المعيشة كنقصد بيها المصاريف اللي غادي تحتاج باش تصرف على راسك في الطعام والشراب وفالمطاعم والتسوق والمواصلات

تكاليف الطعام في كولومبيا :

كتكلف وجبة في مطعم كيقدم الطعام المحلي ما بين 3 الى 5 دولارات أمريكية في المدن الكبرى

ولكن في الفيلاجات والأرياف فكتكلف الوجبة في المطعم  ما بين 1,5 الى 3 دولارات فقط

الى بغيتي تضرب الوجبات الخفيفة بحال empanadas بسعر 0,06 الى 0,15 دولار ، ولا غلا عليك أمسكين

تقدر تقصي واحد الأكلة مشهورة عندهم سميتها arepa ب، 0,9 دولار ولا أكلة Ceviche اللي كيبلغ ثمنها 5 دولار تقريبا

هادي كانت بعض الأثمنة ديال الأطعمة الخاصة بهم

أما الى بغيتي تاكل الطعام الغربي والعالمي فالسعر غايكون ما بين 5 الى 15 دولار على حساب المطعم والمكان اللي نتا فيه

تكلفة التسوق في كولومبيا :

التسوق من لحوانت رخيص ومغاديش يجيك غالي ومكيتعداش 35 دولار في السمانة الى كنتي كتخسر.

تكاليف وسائل النقل في كولومبيا

بشكل عام النقل المحلي فكولومبيا رخيص :

  • الميترو فحدود 0,76 دولار
  • الطوبيسات مابين0,30 الى 0,80 دولار
  • الطاكسيات مكتعداش 6 دولار في المدن الكبرى وتقدر تآنسطالي تطبيقات بحال Tappsi أو Easy Taxi باش تضمن حصولك على خدمة سيارات أجرة موثوقة
  • خدمات Uber مكتعداش 5 دولار
  • Colectivo – كوليكتيفو بحال النقل المزدوج ولكن تقدر تكون سيارة جيب كبيرة أو أي سيارة أخرى كتستخدم للرحلات القصيرة بين المدن هي من أسرع وسائل النقل ولكن خاصك تفاوض على الثمن وضرب على راسك، وفالغالب السعر كيكون زايد بشي 30% على سعر الحافلات
  • الحافلات كايتعتابرو من أفضل وسائل النقل في كولومبيا. كتكلف الرحلة بين بوغوتا وميدلين حوالي 20 دولار تقريبا . المهم الأسعار كتختالف ونتا سول على راسك
  • الطيران – غالبًا ما كتكون شركات الطيران منخفضة التكلفة مقارنة مع الحافلات في الرحلات البعيدة وتقدر تكون غي 36 دولار

أفضل أوقات السياحة في كولومبيا :

في خريطة كولومبيا كنلاحظو بللي الموقع ديال هاد لبلاد جاي فخط الاستواء الشي اللي كيخلي المناخ متناسق على دور لعام.

هداك علاش كيبلغ متوسط الحرارة اليومية حوالي 24 درجة الى كنتي قريب للساحل و مابين 7 الى 17 درجة الى كنتي فمناطق مرتفعة

من هادشي كولو فدروة الموسم السياحي كتكون فشهر 12 حتى لشهر 3 وكذلك الأسبوع اللي كيسبق عيد الفصح (سيمانا سانتا).

هداك علاش فهاد الأوقات كتكون الأسعار غالية، يعني الى كنتي كتقلب على الرخا والريباخا ، فكنصحك تبعد على هاد الشهورا فكولومبيا.

ولكن الى كان الجيب عامر فهاد الأوقات اللي كايكونوا فيها المهرجانات والأنشطة السياحية اللي كتجلب السياح من كل صوب وحدب.

هل كولومبيا آمنة للسياح ؟

دابا من تعرفنا على كيفية السفر من المغرب إلى كولومبيا وتعرفنا على أفضل الأماكن السياحية فيها تكاليف المعيشة .. موال واحد السؤال يقدر يطيح فبال أي واحد هو ” واش منخافش على راسي فكولومبيا “

باش نكونوا واضحين داك لفكرة ديال غادي تعرض لخطف والفدية وداكشي ديال الأفلام مكاينش منو.

ولكن ضروري خاصك تدير أطونسيو من السرقة والكريساج خصوصا فالليل، وهاد القضية راه السكان المحليين غادي ينبهوك ليها.

المهم الى كان عندك شي تيلفون زايد أو عندك شي ساعة أو مجوهرات (بالنسبة للبنات) فمن الأحسن خبيوهم باش، ما يديرولكش كان الله وباقي الله.

ولكن فالأماكن السياحية المشهورة متخافش حيت كاين لمخزن ديالهوم كيدور  ومأمن لقضية.

إذن هادشي اللي قدرنا عليه الله فموضوع السفر من المغرب الى كولومبيا بدون فيزا نتمنى نكون توفقت في تقريب الصورة للقارئ الكريم حول هاد الموضوع واللي عندو شي سؤال ميتردد بترك تعليق أسفل المقال

اقرأ أيضا:

توفيق بوريابة

محب للسفر والترحال، ومحب للكتابة والتدوين، لذلك فمقالاتي هي نتاج لهذين الحبين وعلى أساسهما أطمح في أن يجد القارئ في مقالاتي كل ما يبحث عنه من معلومات مفصلة حول المواضيع المتعلقة بالهجرة ، السياحة، التأشيرات...،وأن يستفيد من الخبرة التي كونتها في هذا المجال لسنين، وأن يجد أيضا المتعة في القراءة ، على أمل الجمع بين الحسنيين (المتعة والفائدة). للتواصل معي على فيسبوك : https://www.facebook.com/taoufik.999 للتواصل معي على تويتر taoufikbouriaba@

‫15 تعليقات

  1. كيفاش ندير تامين صحي انا غادي نسافر من الامارات وانا هنا معنديش تامين لاني جيت زيارة ممكن تجاوبني ؟ شكرا

    1. تأمين صحي تقدري تقلبي عليه فالأنترنت راه كاينين شركات متخصصة فهاد الشي والمبلغ ديال التأمين كيكون مابين 400 الى 600 درهم مغربي.
      الى بغيتي تعرفي شي معلومات اضافية على التأمين الصحي تقدري تقراي هاد الموضوع اللي نشرناه على التأمين الصحي للسفر واخا المقال مركز على فيزا شنغن ولكن راه نفس الأمر كينطابق على جميع جهات العالم
      https://hijrapost.com/%d8%aa%d8%a3%d9%85%d9%8a%d9%86-%d8%a7%d9%84%d8%b3%d9%81%d8%b1-%d8%a7%d9%84%d8%b4%d9%86%d8%ba%d9%86.html

  2. السلام عليكم . أنا ذهبت إلى القنصلية باش نشوف شني هي الوثائق لمطلوبة باش منستعد الى السغر كلومبيا ولكن قالولي لابد التأشيرة قتلم بلي تلغات قالولي باقي .واش بغيت نعرف منكم هدشي صحيح ولا. لا . أفيدوني وشكرا لكم .وبالنسب الرحلة أنا أحب الرحلة إلى هناك وااسفر إلى كلومبيا هل من جمعيات منظمة في مجال الرحلة إلى هناك *

    1. الاتفاقية بالصح علنوا عليها بللي غادي يلغيو التأشيرة بين المغرب وكولومبيا، ولكن لحد الساعة مزال الاتفاقية مدخلات حيز التنفيذ، هداك علاش راه غادي تحتاج فيزا الى بغيتي تسافر لكولومبيا.
      بالنسبة للجمعيات المنظمة للرحلات فمعدناش بهم شي علاقات ومن جهة أخرى موقع هجرة بوست كيقدم معلومات على السفر والهجرة والدراسة في الخارج فقط، وماشي مكتب سفر أو منظمة سياحية 🙂
      نتمناو ليك التوفيق

  3. السلام عليكم
    أنا مغربي مقيم خارج الوطن هل السفر من اسطنبول الى كولومبيا والعودة لاسطنبول فيه اي اختلاف ؟

    1. عليكم السلام .. لحد الساعة فإن الإعفاء من التأشيرة لم يدخل حيز التنفيذ، لذلك فكونك مغربي في اسطبول سيكون عليك استخراج التأشيرة

  4. السلام عليكم ورحمة الله وبركاته أخي ، على حساب واش كاينة شي رحلة مباشرة من المغرب لكولومبيا ، حيت لقيت اغلب الرحلات فيهم محطة الترانزيت والتوقف بمدريد أو لندن أو لشبونة يعني دول لي لخاصك تأشيرة ليهم ، يعني واش كاينة شي رحلة مثلا لدولة بدون تأشيرة للمغاربة وبعدها تمشي لكولومبيا ، أو رحلة من المغرب اتجاه البرازيل وبعدها دخل كولومبيا ، هادشي بعدما يتنفذ القرار ديال إلغاء التأشيرة من المغرب لكولومبيا، نتمنى تفسير منكم وشكرا

    1. عليكم السلام ورحمة الله.. اللي قبيح فهاد الدول أنه مكاينش رحلات مباشرة من المغرب الى كولومبيا أو الى البرازيل ، يعني ضروري خاصك تدوز من الترانزيت .
      نتا هنا كيبقا خاصك تقلب على الدول اللي كيبدخلو ليها لمغاربة بلا تأشيرة وتشوف واش كاينين فيها رحلات مباشرة بعد من المغرب لهاد الدول ثم تشوف واش كاينة رحلات مباشرة من ديك الدولة لكولومبيا .
      الدول اللي يقدرو يدخلو ليها لمغاربة بلا تأشيرة هاهي فهاد فرابط اللي لتحت، شوف الدول وقلب على راسك ، أما أنا والله الى عيت نقلب ومالقيتش ههههه
      https://hijrapost.com/%d8%af%d9%88%d9%84-%d8%a8%d8%af%d9%88%d9%86-%d9%81%d9%8a%d8%b2%d8%a7-%d9%84%d9%84%d9%85%d8%ba%d8%a7%d8%b1%d8%a8%d8%a9.html

  5. اخي الكريم عندي تدكرة الدهاب والاياب من المغرب الى بوغوتا ٣٠ نهاية الشهر حيث ادركت ان لم يتم الاتفاق بعد هل يمكنك المساعدة بفكرة هل يمكن السفر حاليا او ليس بعد وشكرا
    ا

    1. مرحبا الأخ سيمو: المشكل ديال هاد الاعفاء أن التطبيق ديالو مزال معطل وهاد القرارات كياخدو وقت واخا كيقولو دخلت حيز التنفيذ ، المهم نتا دابا خاصك تستخرج الفيزا وراها ساهلة فالاجراءات مكتطلبش شي حاجة صعيبة
      دخل لهاد الموقع اللي تابع للخارجية الكولومبية وتبع معاهم باش تعرف شنو خاص تدير باش تستخرج فيزا كولومبيا
      https://www.cancilleria.gov.co/en/procedures_services/visa/requirements

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى